СИПРИ (Стокголм халқаро тинчлик тадқиқотлари институти) 56 йиллик ҳисоботида айтишича, дунё янги ядровий қуролланиш пойгасига кириб бормоқда. АҚШ, Россия, Хитой, Ҳиндистон, Покистон, Британия, Франция, Шимолий Корея ва Исроил ядровий арсеналларини жадал кенгайтирмоқда.
Ҳисоботда таъкидланишича, янги ядровий каллаклар сони тез суръатда ортмоқда ва бу демонтаж қилинаётган эски қуроллар сонидан ошиб кетмоқда. Хитой айниқса тез ривожланаётган давлат сифатида кўрсатилиб, унинг ядровий заҳираси 600 та каллакка яқинлашгани айтилмоқда.
Хитой юзлаб янги ракета шахталарини қурмоқда, бу эса уни 2020 йилларнинг охирига келиб АҚШ ва Россияга яқинлаштириши мумкин. СИПРИ ҳисобича, Хитой 2035 йилгача 1500 та ядровий каллак ишлаб чиқариши мумкин.
Шунингдек, Шимолий Корея ҳам ўз ядровий имкониятларини кескин ошириш йўлида ҳаракат қилмоқда. СИПРИ бу ҳолатни жаҳон хавфсизлигига таҳдид сифатида баҳоламоқда.