Европа Иттифоқи Ўзбекистон ҳукуматига 2020–2030 йилларда қишлоқ хўжалигини ривожлантириш стратегиясини амалга оширишни қўллаб-қувватлаш учун €7 миллион миқдорида грант ажратди. Бу ҳақда ЭИнинг Ўзбекистондаги элчиси Тойво Клаар қишлоқ хўжалиги вазири Иброҳим Абдураҳмонов билан учрашув чоғида маълум қилган.
Янги маблағ ЭИнинг Ўзбекистон аграр секторини мустаҳкамлашга қаратилган умумий €20 миллионлик мажбуриятининг таркибий қисми бўлиб, шундан €6 млн 2023 йилда ажратилган эди. Қолган €7 млн эса 2026 йилгача бўлган даврда ислоҳотларни давом эттириш ва белгиланган мақсадли кўрсаткичларга эришиш шарти билан тақдим этилади.
Элчи Тойво Клаарнинг таъкидлашича, Европа Иттифоқи аграр соҳада ҳукуматга тўғридан-тўғри грант ажратувчи кам сонли ҳамкорлардан бири бўлиб қолмоқда. У иқтисодий ер фойдаланиш ҳуқуқларини мустаҳкамлаш ва озиқ-овқат хавфсизлиги бошқарувини кучайтириш бундан кейинги асосий вазифа эканини айтиб, ЭИ Ўзбекистонни қолган ислоҳотларни якунлашда қўллаб-қувватлашни давом эттиришини билдирди.