Тошкент шаҳридаги “Central Asian” олийгоҳида илк маротаба “QS Евроосиё форум 2025” доирасида семинар бўлиб ўтди. Семинарда Қозоғистон, Озарбайжон, Грузия каби давлатлардан фан ва олий таълим вакиллари иштирок этди. Мазкур форум “Quacquarelli Symonds Limited” халқаро рейтинг ташкилоти ҳамкорлигида ташкил этилди. Форум доирасида “Имкониятларни кенгайтириш: олий таълимда глобал кўприкларни қуриш” мавзусида семинар ўтказилиб, унда олий таълимда халқаро ҳамкорлик, академик нуфузни ошириш каби масалалар муҳокама қилинди. Шунингдек, панел сессиялар ва маҳорат дарслари ҳам ўтказилди.
Семинар давомида “Quacquarelli Symonds Analytics Users Workshop” иловасидан фойдаланиш тартиби ва унинг қулайликлари ҳақида QS менежери Хуан Карлос Мехия-Куартас томонидан тушунтиришлар берилди. Яъни, бирор олийгоҳ ушбу илова орқали университетлар кесимида талаба ва профессор-ўқитувчилар томонидан эришилган ютуқларни солиштириб бориши мумкин. Мазкур илова орқали талаба ва профессор-ўқитувчиларнинг турли йўналишларда қўлга киритган сертификат ва ютуқлари ҳақида маълумотлар жойлаштирилади ҳамда уларга кириш имконияти мавжуд. Бу платформадан дунёнинг барча университетлари фойдаланиши мумкин.
Шунингдек, “Holoniq by QS” иловаси ҳақида ҳам маълумот берилди. Ушбу иловадан бот кўринишида фойдаланиш имконияти мавжуд бўлиб, унинг қулай жиҳатларидан бири — турли тилларда ишлаш имкониятидир. Мазкур ботдан фақат “Holoniq by QS” бўйича саволларга жавоб олиш мумкин.
.webp)
Форум давомида олий таълимда халқаро ҳамкорлик масаласига бағишланган семинар ҳам ўтказилди. Унда Ўзбекистонда амалга оширилаётган кенг қамровли ислоҳотлар ҳақида сўз юритилди. Жумладан, университетларнинг мустақиллигини кучайтириш, академик дастурларни меҳнат бозори эҳтиёжларига мослаштириш, инновацион экотизимларни ривожлантириш ва бандликни тизим самарадорлигининг асосий кўрсаткичига айлантириш масалалари таъкидланди.