“Реал Мадрид” футбол клуби президенти Флорентино Перес жамоа таркибини янада кучайтириш мақсадида бир қатор стратегик трансфер вариантларини кўриб чиқмоқда. Бу борада клуб раҳбари “Манчестер Сити” ҳужумчиси Эрлинг Холандни сотиб олиш имкониятини муҳокама қилаётгани маълум қилинди. Мазкур маълумотни Cadena Ser нашри эълон қилган бўлиб, унга кўра, Холанд трансфери Винисиус Жуниорнинг эҳтимолий сотилиши билан боғлиқ тарзда амалга оширилиши мумкин.
Маълумотларга кўра, “Реал Мадрид” президенти жамоада Холанд ва Килиан Мбаппе каби ҳужумчиларнинг бир вақтнинг ўзида ҳаракат қилишини истамоқда. Агар Винисиус Жуниор бошқа клубга трансфер қилинса, ундан тушадиган маблағ норвегиялик ҳужумчи билан шартнома тузиш учун йўналтирилади.
Аввалроқ Винисиусга Саудия Арабистонининг бир нечта профессионал футбол клублари томонидан қизиқиш билдирилди. 25 ёшли бразилиялик футболчининг “Реал Мадрид” билан амалдаги шартномаси 2027 йил ёзига қадар амал қилади. Transfermarkt портали футболчининг бозор қийматини 170 миллион евро деб баҳоламоқда. Ўтган мавсумда Винисиус 58 та расмий учрашувда иштирок этиб, 22 та гол урган ва 19 та голли узатма берган.
Шу билан бирга, “Манчестер Сити” сафида тўп сураётган Эрлинг Холанд жорий мавсумда 48 та ўйинда 34 та гол урган ва 5 та ассист муаллифига айланган. 25 ёшли норвегиялик ҳужумчининг клуб билан шартномаси 2034 йилнинг июн ойигача амал қилади. Transfermarkt маълумотларига кўра, унинг бозор баҳоси 180 миллион еврога тенг.
Флорентино Переснинг режаларига кўра, мазкур трансфер амалга оширилса, “Реал Мадрид” жаҳон футболининг энг кучли ҳужум чизиғига эга клублардан бирига айланиши мумкин.