Эрон олий раҳнамоси Оятуллоҳ Али Хоманай мамлакатда давом этаётган оммавий норозилик намойишлари фонида АҚШ президенти Доналд Трамп ҳақида кескин баёнот берди. Давлат телевидениеси орқали намойиш этилган нутқида у Трамп «албатта қулашига маҳкум» эканини таъкидлади ва Эрон Ислом Республикаси босимлар қаршисида чекинмаслигини билдирди. Бу ҳақда The Times of Israel хабар берди.
Хоманай ўз чиқишида тарихий мисоллар келтириб, Фиръавн, Намруд, Ризо шоҳ ва Муҳаммад Ризо каби «золимлар» ҳокимиятининг энг юқори чўққисида қулаганини эслатди. «Трамп шуни билиши керакки, уларнинг барчаси кибрининг авжида тахтдан ағдарилган. У ҳам худди шундай тақдирга дучор бўлади», деди Эрон олий раҳбари.
Шунингдек, Хоманай намойишчиларни «бузғунчилар» ва «саботажчилар» деб атаб, уларни хорижий кучлар, хусусан АҚШ манфаатларига хизмат қилишда айблади. Унинг сўзларига кўра, тартибсизликлар чоғида давлат ва жамоат мулкига зарар етказилган, Теҳрон эса «чет элликлар ёлланмаси» сифатида ҳаракат қилаётганларга тоқат қилмайди.
Сўнгги ҳафталарда Эронда инфляция ва миллий валютанинг кескин қадрсизланиши сабаб бошланган норозиликлар мамлакатнинг барча вилоятларига ёйилди. Инсон ҳуқуқлари ташкилотлари ўнлаб қурбонлар ва минглаб ҳибсга олишлар ҳақида хабар бермоқда. Норозиликлар дастлаб иқтисодий талаблар билан бошланган бўлса, ҳозирда бевосита ҳукумат ва олий раҳбарга қарши сиёсий шиорлар билан давом этмоқда.