Эроннинг бир қатор шаҳарларида ҳукуматга қарши оммавий намойишлар давом этмоқда. Хорижий ва маҳаллий манбаларга кўра, 8-январ куни Шимолий Хуросон вилоятининг Эсфараен шаҳрида юз берган тартибсизликлар вақтида шаҳар прокурори Али Акбар Ҳусайнзода ҳамда бир неча хавфсизлик кучлари ходимлари ҳалок бўлган. Бу ҳақда BBC маълум қилган.
BBC Persian тасдиқлаган видеоларда Теҳрон, Машҳад ва бошқа йирик шаҳарларда минглаб одамлар кўчаларга чиққанини акс этган. Намойишчилар Эрон олий раҳбари Али Хоманай истеъфога чиқишини талаб қилиб, мамлакатни тарк этган собиқ шоҳнинг ўғли Реза Паҳлавий номини тилга олган шиорлар билан чиқиш қилган. Айрим ҳудудларда кузатув камераларига зарар етказилгани ҳам қайд этилган.
Норозиликлар Эрон миллий валютасининг кескин қадрсизланиши ортидан бошланган бўлиб, ҳозирга келиб мамлакатнинг барча 31 вилоятини қамраб олгани айтилмоқда. Инсон ҳуқуқлари ташкилотлари маълумотига кўра, сўнгги кунларда ўнлаб намойишчилар ва хавфсизлик ходимлари ҳалок бўлган, минглаб фуқаролар эса қўлга олинган. Расмий Теҳрон бу рақамларни тасдиқламаган.
Шу билан бирга, NetBlocks интернет мониторинг хизмати Эронда мамлакат миқёсида интернет чекловлари жорий этилганини билдирди. Давлат ОАВлари эса намойишлар кўламини кичрайтириб кўрсатмоқда ёки айрим ҳудудларда норозиликлар бўлганини инкор этмоқда. Таҳлилчиларга кўра, бу воқеалар 2009-йилдан бери Эронда кузатилган энг йирик ижтимоий-сиёсий норозиликлардан бири бўлиши мумкин.