Давлат хавфсизлик хизмати Фарғона вилояти бўйича бошқармаси ходимлари томонидан божхона ҳамда ички ишлар органлари билан ҳамкорликда ўтказилган тезкор тадбирлар давомида Тожикистондан ноқонуний олиб кирилган йирик миқдордаги гиёҳвандлик воситалари муомалага киритилишининг олди олинди. Бу ҳақда ДХХ Zamon.uz’га хабар берди.
Хусусан, Қўқон шаҳрида 1984 йилда туғилган фуқаронинг яшаш хонадонни кўздан кечириш давомида ошхона қисмидан 4 кг 572 грамм «опий» ва 1 кг 58 грамм «гашиш» аниқланиб, процессуал тартибда расмийлаштириб олинди. Шунингдек, ушбу шахсга Тожикистондаги наркосавдогарлар томонидан «WhatsApp» мессенжери орқали юборилган геолокация асосида аввалроқ Данғара тумани ҳудудига яшириб кетилган 9 кг 980 грамм «опий» моддаси ҳам аниқланиб, мусодара қилинди.
Бундан ташқари, Қўқон шаҳрида истиқомат қилувчи 1969 йилда туғилган шахс гиёҳвандлик воситаларини қайта ишлаш учун яшаш хонадонда ноқонуний нарколаборатория ташкил этгани аниқланиб, ундан 7 кг 226 грамм «опий» моддаси олинди.
Яна бир ҳолатда Қўқон шаҳри ҳудудида ҳаракатланаётган «Lacetti» русумли автомашина тўхтатилиб, кўздан кечирилганда, 1980 йилда туғилган фуқаро томонидан аввалроқ 34 минг АҚШ долларига харид қилинган 5 кг 22 грамм «опий» моддаси борлиги аниқланди. Тезкор тадбир давомида ушбу гиёҳвандлик воситасини сотган 1985 йилда туғилган маҳаллий фуқаро ва унинг жиноий шериги — 1985 йилда туғилган Тожикистон фуқароси қўлга олинди. Шунингдек, тожикистонлик шахснинг Ўзбекистон туманидаги яшаш хонадондан ҳам 2 кг 362 грамм «опий» моддаси мусодара қилинди.
Қўқон шаҳрида қайд этилган яна бир ҳолатда «Nexia» русумли автомашина тўхтатилиб, холислар иштирокида кўздан кечирилганда, унда йўловчи сифатида кетаётган 1992 йилда туғилган фуқаронинг сумкасидан 982 грамм «гашиш» моддаси топилди. Аниқланишича, ушбу гиёҳвандлик воситаси аввалроқ тожикистонлик наркокурьерлар томонидан шаҳарнинг яширин жойига қолдириб кетилган бўлган.
Шунингдек, Фарғона шаҳрида ўтказилган тезкор тадбир давомида 2000 йилда туғилган шахс Тожикистондан олиб келинган 989 грамм «гашиш» моддасини 150 миллион сўмга сотаётган вақтда ашёвий далиллар билан ушланди.
Ҳозирда барча ҳолатлар юзасидан Жиноят кодексининг 246 ва 273-моддалари билан жиноят ишлари қўзғатилиб, гумонланувчиларга нисбатан «қамоқ» эҳтиёт чораси қўлланилган. Тергов ҳаракатлари олиб борилмоқда.