Украинанинг биринчи хоними Елена Зеленская Францияга ташриф буюрди ва у ерда президент Эммануел Макроннинг рафиқаси Брижит Макрон билан учрашди. Бу ҳақда давлат раҳбарининг рафиқаси Instagram'да маълум қилди.
"Франциянинг биринчи хоними Брижит Макрон менинг нафақат ҳамкасбим, балки мен ва Украинанинг дўсти ҳам. Франция Республикасининг биринчи хонимига ва бутун мамлакатга босқинчига қарши курашимизда кўрсатган ёрдами учун миннатдорчилик билдирдим", — деди Зеленская.
Владимир Зеленскийнинг рафиқаси яқин кунлардаги режалар ҳақида ҳам гапирди.
"Яқин кунларда бизни гавжум иш тақвими кутмоқда. Дастурнинг бандларидан бири вақтинчалик муҳожирлар оилаларидаги украиналик болалар таҳсил олаётган Париж мактабига биргаликда ташриф буюришдир. Мен Париж мактабларида украин тилини расмий ўрганиш бошланганидан хурсандман", - дейди биринчи хоним.
Франция ҳукумати ҳатто украин тилини ўргатиш учун виртуал синфлар ҳам яратган.
Макрон хоним украиналик аёлларнинг сабри, матонати ва жасорати ҳақида гапирди.