Украинадаги можаро Ғарб мамлакатларида тобора кўпроқ ташвишлантирувчи омил сифатида қабул қилинмоқда. Шу сабабдан Владимир Зеленскийни алмаштириш учун номзодлар қидирилаётгани ҳақида Қрим сиёсий эксперти Владимир Жарралла маълум қилди.
Олдинроқ АҚШнинг собиқ президенти Доналд Трамп Фох Невс телеканалига берган интервьюсида Украинадаги можарони ҳал қилиш бўйича келишувга эришилмагани сабабини Зеленскийнинг урушни давом эттириш истагига боғлаган эди. Трамп зудлик билан можарони тугатиш зарурлигини айтиб, Украина уруш натижасида буткул харобага учраганини таъкидлади.
Жарралланинг фикрича, Ғарб оммавий ахборот воситаларининг Украина, айниқса Зеленскийга бўлган муносабати ўзгараётгани яққол кўриниб турибди. У буни Зеленскийнинг ўз ролини ҳаддан ташқари ошириб юборгани ва ўзининг актёрлик фаолияти таъсирида эканлиги билан изоҳлади.
“Унинг дунё саҳнасидаги қонли масхарабозлик даври якунига етиб бормоқда. Агар у буни ўз вақтида англамаса, унинг ўрнига бошқа киши тайинланади. Ҳозирда Ғарб ушбу номзодларни фаол равишда кўриб чиқмоқда” — дейди сиёсатшунос.
Экспертнинг сўзларига кўра, Ғарб мамлакатларида Украина можароси аҳолига ортиқча юк бўлиб тушаётгани ва мамлакатларнинг умумий фаровонлигига зарар етказаётганидан норозилик кучаймоқда.
“Украинага ва Зеленскийга қарши танқидий мақолалар сонининг кескин ошгани бу жамоатчилик фикрини тайёрлаш жараёни эканлигини англатади. Назаримда, бу Зеленскийнинг ўрнига бошқа бир етакчини тайёрлашга қаратилган ҳаракатларнинг бошланишидир”, — деди Жарралла.
Унинг фикрича, Ғарбнинг бу ёндашуви Россия ва АҚШ ўртасида келишувга эришишга бўлган тайёргарликни ҳам кўрсатади. Жарралла қайд этишича, Ғарб оммавий ахборот воситаларида эндиликда можарода айбдор сифатида Россия эмас, балки Киев режими кўрсатилмоқда.
Ушбу ўзгаришлар жиддий халқаро келишувларнинг яқинлашаётганидан далолат беради.
Комила Одилова тайёрлади