Astoria Grande лайнери Сочидан Туркияга 2022 йилнинг июл ойидан бери қатнайди.
Astoria Grande круиз лайнерининг бортида руслар билан Батуми портига келиши грузиялик мухолифатчиларнинг норозилигига сабаб бўлди. Фаоллар курорт шаҳарчаси пристанида норозилик намойиши уюштиришди. Мухолифатчиларга кўра, йўлда сайёҳлар Абхазия ва Жанубий Осетияга бориб, бу билан Грузиянинг “Ишғол тўғрисида”ги қонунини бузган.
Бу ҳам етмагандек, кемадаги айрим россияликлар “Абхазияни грузинлардан Россия озод қилгани” ҳақидаги даъволари оловга мой қуйгандек бўлди.
Айрим намойишчилар Украина байроғини кўтариб олгани, айримлари эса Россия байроғини ёққани хабар берилмоқда.
Норозилик намойишларидан кейин Astoria Grande лайнери портни тарк этган. Грузия расмийлари кема Сейшел ороллари байроғи остида сузиб юрганини ва унинг портга кириши тижорий сафар эканлигини таъкидлашган.
Грузия ҳукумати келажакда россиялик сайёҳлар бўлган Astoria Grande лайнерини Ботуми портига киритмасликка қарор қилди.
Грузия Абхазия ва Жанубий Осетияни 2008 йилдаги қуролли можародан кейин Россия томонидан босиб олинган ҳудудлар деб билади.
31 июлга ўтар кечаси норозиликлар янада кучайди. Грузия матбуотига кўра, полиция портда хавфсизликни кучайтирган ва металл тўсиқлар ўрнатган. Намойишчилар полиция билан тўқнашган. Бир қанча ҳибсга олинганлар ҳақида хабарлар бор.