Президентнинг 2025 йил 30 декабрдаги қарорига мувофиқ, мамлакатда ижтимоий соҳа инфратузилмасини ривожлантиришга қаратилган янги молиявий механизм жорий этилмоқда.
Хусусан, ижтимоий аҳамиятга эга объектларни барпо этиш ва янгилашни тизимли молиялаштириш мақсадида Ижтимоий соҳа муассасаларини қуриш ва таъмирлаш жамғармаси ташкил этилади.
Мазкур жамғарма таълим, соғлиқни сақлаш ҳамда спорт соҳаларига оид муассасаларни қуриш, реконструкция қилиш ва капитал таъмирлаш ишларини молиявий қўллаб-қувватлашга йўналтирилади.
Қарор билан жамғарма фаолияти орқали ҳудудларда ижтимоий инфратузилманинг ҳолатини яхшилаш ва аҳолига кўрсатилаётган хизматлар сифатини ошириш кўзда тутилган.
Жамғарма маблағлари, энг аввало, умумтаълим мактаблари, тиббиёт муассасалари ва спорт иншоотларини қуриш ҳамда таъмирлашга йўналтирилади. Шу билан бирга, ушбу муассасаларнинг моддий-техника базасини мустаҳкамлаш, уларни замонавий ускуналар, ўқув ва тиббий жиҳозлар ҳамда ахборот-коммуникация технологиялари билан таъминлаш устувор вазифалар этиб белгиланган.
Қарорга асосан, жамғарма маблағларидан бошқа ижтимоий йўналишлардаги қурилиш ва таъмирлаш лойиҳаларини молиялаштиришда ҳам фойдаланиш имконияти яратилади. Бу эса ҳудудларда ижтимоий инфратузилмани комплекс ва мутаносиб ривожлантиришга хизмат қилади.