Илҳом Алиев Россияни Украина ҳудудидаги Озарбайжон дипломатик объектларига қасддан зарба берганликда айблади. Бу ҳақда у Украина президенти Владимир Зеленский билан учрашувдан сўнг маълум қилди.
Алиевнинг таъкидлашича, Украинадаги Озарбайжон элчихонаси уч марта ҳужумга учраган. Унинг айтишича, биринчи зарбадан кейин бу тасодиф деб ўйланган, аммо дипломатик объектларнинг аниқ координаталари Россия томонига тақдим этилганига қарамай, яна икки бор ҳужум содир этилган.
Президент бу ҳолатни Озарбайжон дипломатик ваколатхоналарига қарши мақсадли ҳужум деб баҳолади. Унинг сўзларига кўра, Москва томонига расмий нота юборилган ва Россия элчиси Ташқи ишлар вазирлигига чақирилган. Алиев Россия ҳаракатларини “нодўстона қадам” деб атади.
Россия Ташқи ишлар вазирлиги эса бу айбловлардан «ҳайратда» эканини билдирди. Вазирлик зарбаларни режалаштиришда дипломатик объектларнинг жойлашуви ҳисобга олиниши ва тинч аҳолига зарар етказмаслик учун барча маълумотлар текширилишини таъкидлади. Шунингдек, элчихонага етган зарар Украина ҳаво ҳужумидан мудофаа тизими нотўғри ишлаши оқибатида юзага келганини даъво қилди.
Мазкур баёнотлар Россия ва Озарбайжон ўртасидаги муносабатлар кескинлашган бир пайтда янграмоқда. Хусусан, 2024 йил декабрь ойида Озарбайжон самолёти ҳалокати ва 2025 йилда Екатеринбургда озарбайжонликларга қарши ўтказилган рейддан сўнг икки давлат ўртасидаги зиддият кучайган эди.