Қурилиш ва уй-жой коммунал хизмат кўрсатиш вазирлиги матбуот хизмати шаҳарсозлик норма ва қоидаларига тадбиқ этилаётган янгиликлар ҳақида маълумот берди.
Шаҳарасозлик норма ва қоидалари киритилаётган ўзгаришларга кўра, эндиликда бино ва иншоотларни реконструкция қилиш ёки таъмирлаш бинонинг эксплутасиявий характеристикасига, хавфсизлигига салбий таъсир кўрсатмаслиги, санитария-гигиена талаблари даражасини пасайтиришга олиб келмаслиги шарт.
«Яна бир янгилик, энди бино ва иншоотнинг реконструкция қилинмайдиган, ўзгартирилмайдиган ёки таъмирланмайдиган қисмлари, янги қурилган бино ёки иншоотларга нисбатан қўлланиладиган талабларга мувофиқ бўлиши шарт эмас. Бунда, таъқиқланмаган материалларни қўллаш ёки асбоб-ускуналарни ўрнатишда ушбу материал ёки ускунани хавфсиз ўрнатиш билан боғлиқ стандарт қоидаларига риоя қилиниши керак», — дейилади хабарда.
Бундан ташқари, бундан буён бино ва иншоотлар қурилишида автотураргоҳларни ҳудудлар кесимида киши бошига кўра лойиҳалаштириш талаби белгилаб қўйилмоқда. Жумладан, Тошкент шаҳри ва вилоятида 1 хонадонга 1та автотураргоҳ ўрни, бошқа вилоятларда эса 2 хонадонга 1та автотураргоҳ бўлиши назарда тутилмоқда.
Шунингдек, мактаб ва боғчаларда 25 нафар болага 1та, олий таълим муассасаларида 4 нафар талабага 1та, шифохона ва поликлиникаларда 5 нафар қатновчига 1та, маъмурий офис, ташкилот ва хўжалик муассасалари биноларининг 10 метр квадрат қисмига 1та, масжидларда 10 нафар ташриф буюрувчи учун 1та, бозорлардаги ҳар иккита савдо жойига биттадан, меҳмонхоналардаги ҳар 5 та ўринга 1 тадан автотураргоҳ бўлиши шартлиги белгилаб қўйиляпти.
