Суриянинг муваққат президенти Аҳмад аш-Шараа БМТ Бош Ассамблеяси минбаридан нутқ сўзлаб, Исроил мамлакатни янги можароларга тортишга уринаётганини маълум қилди.
“Сурия 60 йилдан бери босим остида. Халқ йиллар давомида азоб-уқубат ва етишмовчиликларга дуч келди. Ўз ҳуқуқини талаб қилганларда эса ўлим хавфи бўлди. Исроил бугунги ўтиш давридан фойдаланиб, мамлакатимизни яна можарога тортиши мумкин. Бунинг оқибатини ҳеч ким олдиндан айта олмайди”, — деди у.
Аш-Шараа Сурия муаммосини мулоқот ва дипломатия орқали ҳал қилиш зарурлигини таъкидлаб, халқаро ҳамжамиятни Дамашқни қўллаб-қувватлашга чақирди. У миллий диалог бошланганини, технократлар ҳукуматини тузганини ва қуроллар давлат назоратида бўлишига асосланган фуқаролик ҳамда ҳарбий институтлар қайта ташкил этилганини қайд этди.
Шунингдек, Аш-Шараа Асад режими даврида жорий этилган санкцияларни бекор қилишни талаб қилди.