Исроил Украинага дронларга қарши кураш тизимларини сотади. Бу ҳақда қатор украиналик ва исроиллик амалдорларга таяниб Axios хабар берди.
Гап радиоэлектрон кураш тизимлари ҳақида бормоқда. Улар РФ армияси кенг фойдаланаётган Эрон дронларини уриб тушириш имконини беради.
Нашр манбаларига кўра, февраль ойида Исроил мудофаа вазири Йоав Галлант ва ТИВ раҳбари Эли Коэн юқоридаги тизимлар экспортига лицензия беришга рухсат берган. Бу мамлакат бош вазири Биньямин Нетаньяхунинг Украина можаросига нисбатан муносабатни қайта кўриб чиқиши даврига тўғри келади. Коен Киевга ташрифида Владимир Зеленскийга ҳаво ҳужумига қарши мудофаа тизимлари экспортига рухсат берилганини маълум қилган.
Катта эҳтимол билан Исроилнинг икки компанияси Elbit ва Rafael’га лицензия берилади. Украиналик амалдорлардан бири мамлакат мудофаа вазирлиги делегацияси яқинда Исроилга келганини, аммо ҳеч қандай шартнома имзоланмаганини айтган.
Украинага етказиб берилиши кутилаётган тизимлар 40 километр узоқликдаги нишонларни уриб тушириши мумкин, уларни муҳим инфратузилма объектлари ёнига жойлаштирса бўлади.
Журналистларнинг таъкидлашича, Киев ушбу қурилмага қизиқиш билдирган бўлса-да, бу ўта муҳим эмас. Сўнгги вақтларда мамлакатнинг ўз ҳаво ҳужумига қарши кураш тизимлари 75-90 фоиз дронларни уриб туширмоқда.
Исроиллик амалдорлардан бири Тель-Авив бу орқали дронларга қарши кураш тизими Эроннинг учувчисиз қурилмаларига қарши қай даражада самарали эканини текширмоқчи.
Исроил узоқ вақтдан буён Украинага ҳарбий ёрдам кўрсатишга қаршилик қилиб келаётганди. Бу Россия билан алоҳида муносабатларни сақлаб қолишга ҳаракат билан изоҳланади. Шу билан бирга дронларга қарши кураш воситаларини бериш РФ-Исроил алоқаларига зарар етказмаслиги тахмин қилинмоқда. Чунки ушбу тизимлар соф мудофаа мақсадларида ишлатилади, улар орқали ҳужум операцияларини амалга ошириш мумкин эмас.