"Speedme.ru" хабарига кўра, Ferrari компанияси янги моделни тақдим этишга тайёрланаётгани ҳақида хабар берган эди. Шу пайтгача янги автомаҳсулот ҳақида фақат қисқа-қисқа маълумотлар эълон қилинган ва батафсил айтилмаганди. Энди эса автомобиль бутун “жуссаси билан” омма олдида пайдо бўлди.
Ташқи кўриниши классик Ferrari 330 P3 моделига мос равишда яратилган янги спорткари Daytona SP3 номини олди.
Ишлаб чиқувчиларнинг фикрича, янги моделнинг кузови энг мураккаб аэродинамика шаклини олган.
Аэродинамика двигателни совутиш билан боғлиқ муаммони ҳал қилишга ёрдам беради. Daytona SP3’нинг эса ҳатто эшикларида ҳам ҳавони радиаторларга йўналтирадиган каналлар мавжуд. Эътиборли томони, машинанинг ички қисми ҳайдовчига қаратилган. Бундан ташқари, бошқарувдаги инсон Daytona SP3 функцияларининг 80 фоизини рулдан қўлларини узмаган ҳолда бошқара олади. Автомобилнинг ички қисми спорткарларининг услубида жиҳозланган.
100 км/соат тезликка эришиш учун Daytona SP3’га 2,86 сония кифоя қилади. Агар ҳайдовчи тезликни 200 км/соатга чиқармоқчи бўлса, унда атиги 7,4 сония вақт кетказади.
Ишлаб чиқарувчилардан бирининг сўзларига кўра, спорткарнинг двигатели кучлироқ ва атмосферага бошқа автомобилларга қараганда 30 фоиз камроқ зарар етказади.
Албатта, кучнинг ўзи тезлик учун етарли эмас. Яъни, пойгада фақат тезлик билан ғолиб бўлиш қийин. Компания эса айнан мана шу томонига ҳам эътибор қаратган.
Daytona SP3 корпуси ва шассиси учун композит материаллардан фойдаланилган. Шунингдек, модел кевлар ва углерод билан жиҳозланган. Бундан ташқари, ҳўл ва қуруқ асфальт учун бир хил чидайдиган махсус шиналар буюртма қилинган.
Тадбир доирасида сотувга чиқарилган янги Ferrari Daytona SP3’нинг нархи ҳам, санаси ҳам эълон қилинмаган. Катта эҳтимол билан, Автомобилнинг ишлаб чиқарилиши чекланган бўлади ва унинг нархи ҳам анчагина суммани ташкил этади.
Аввалроқ Lamborghini Countach 2,64 миллион долларлик гибрид суперcар сифатида қайта тақдим этилгани ҳамда 2022-йилда намойиш қилинадиган энг яхши электромобиль ҳақида хабар берилганди.
Оламгир Абдиев