Ижтимоий тармоқларда Юқори Чирчиқ туманида ИИБ ходимлари ва йўл бўйида қулупнай сотиб ўтирган аёллар ўртасидаги келишмовчилик акс этган видеолар тарқалмоқда.
Ходимлар уларни бир неча бор огоҳлантирганини айтади, сотувчи аёл эса буни инкор этиб, илк бор кўриб турганини таъкидлайди.
ИИВ матбуот котиби Шохрух Ғиёсов воқеа юзасидан баёнот берди:
“Юқори Чирчиқ тумани йўлнинг қатнов қисмида, ҳаракат хавфсизлигига халақит бериб қулупнай савдоси билан шуғулланаётган фуқароларнинг, жамоат хавфсизлигини таъминлаш мақсадида жалб этилган ички ишлар органлари ходимларига қаршилик кўрсатиб, жанжал уюштирганликлари акс этган видеолари тарқалмоқда. Албатта, юзага келган хавф зудлик билан бартараф этилиб, жамоат хавфсизлиги таъминланган. Жамоат тартибини бузган барча иштирокчиларнинг шахси аниқланиб, улар билан суриштирув ишлари олиб борилмоқда.
Ҳолат юзасидан расмий муносабат тайёрланмоқда ва тез фурсатда эълон қилинади.
Бундай ҳодисаларни бўрттириш ва ички ишлар органлари ходимларини ёмонотлиқ қилиб кўрсатишга шайланган «жамоатчилик вакиллари» фаоллашганлигини инобатга олиб, ҳақиқий жамоатчилик назорати субъектларидан йўл ёқаларидаги тартибсиз савдо-сотиқ билан боғлиқ муаммолар, улар ортидан келиб чиқаётган йўл-транспорт ҳодисалари ва ҳоказо масалаларга кўпроқ эътибор қаратишларини мақсадга мувофиқ деб ҳисоблаймиз”, — дейилади хабарда.