Шимолий Корея ҳарбийлари делегацияси раҳбари Ким Кум Чеол Зеленограддаги “Ангстрем” пляжига дам олиш учун борган. Орадан бир неча соат ўтгач, унинг ҳамкасблари уни топиша олмаган ва полицияга мурожаат қилган. Эртаси куни КХДР фуқаросининг жасади сув юзига қалқиб чиққан.
Reutersʼнинг қайд этишича, вафот этган фуқаро Ким ир Сен номидаги ҳарбий университетга раҳбарлик қилган. Ким Кум Чеол Москва ва Пёнгянг ўртасида умумқамровли стратегик ҳамкорлик тўғрисида шартнома имзоланганидан сўнг Россияга икки давлат ўртасидаги алмашинув доирасида келган элита делегацияга раҳбарлик қилган. Ташрифнинг бошқа тафсилотлари ҳозирча маълум қилингани йўқ.
Эслатиб ўтамиз, Россия ва Шимолий Корея ўртасидаги муносабатлар июнь ойида Путиннинг Пёнгянгга ташрифидан сўнг янги импульс олди. Жанубий Корея радиосининг маълум қилишича, ташрифдан сўнг, КХДР ўзининг инженерлик қўшинларини Украинанинг оккупация қилинган ҳудудларига “тикланиш ишлари”ни амалга ошириш учун жўнатишни режалаштираётгани маълум бўлган.