Истанбул шаҳрида TURKSOY Халқаро театр мукофотларини топшириш маросими тантанали равишда ўтказилди. Ўн биринчи бор ташкил этилган ушбу нуфузли халқаро тадбирда ташкилотга аъзо давлатларнинг театр соҳасида фаолият юритаётган етакчи ижодкорлари 2025 йил якунлари бўйича турли номинациялар билан тақдирланди.
Қувонарлиси, Ўзбек Миллий академик драма театри актрисаси, Ўзбекистонда хизмат кўрсатган артист Лола Элтоева “Энг яхши театр актрисаси” номинациясида халқаро мукофотни қўлга киритди.
Мазкур маросим ҳар йили Халқаро Анадолу театр мукофотлари доирасида ўтказилиб, туркий давлатлар театр жамоалари ўртасидаги ижодий ҳамкорликни мустаҳкамлаш, умумий маданий меросни тарғиб қилиш ҳамда саҳна санъати ривожига ҳисса қўшишни мақсад қилади.
Шунингдек, бошқа мамлакатлар вакиллари ҳам турли йўналишларда эътироф этилди. Жумладан, Қозоғистондан Эренбак Тойкенов “Энг яхши театр режиссёри”, Қирғизистондан Садир Ниязақунов “Энг яхши саҳна рассоми”, Озарбайжондан Али Эмирли “Энг яхши драматург” ҳамда Туркманистондан Батир Чариев “Энг яхши театр актёри” номинацияларида мукофотланди.