3 декабрь куни афсонавий Тайсон Фьюри трилогияни якунлаш учун яна рингга қайтади. “Лўлилар қироли”нинг бу галги рақиби Дерек Чисора бўлади. У илгари Taйсонга икки марта мағлуб бўлган. Бироқ, Чисора 27 сентябрь куни ўз фаолиятини якунлаганини эълон қилганди.
Рақиб излаш қандай кечди?
Фьюри апрель ойида “Уэмбли”да Диллиан Уэйтни мағлуб этганидан сўнг нафақага чиққанини маълум қилган эди. Кейин эса Александр Усик ва Энтони Жошуа ўртасидаги иккинчи учрашувдан кейин яна рингга қайтишини айтди. У Усикка қарши баҳс олиб бормоқчи эди, аммо Усикка таклиф қилинган саналар украиналикга тўғри келмади. Фьюри эса мутлақ чемпионлик учун курашни узоқ кутишни истамади. Шунинг учун у бир спортчидан иккинчисига “сакраб” ўтди. Шундай қилиб, биринчи марта Дерек Чисоранинг номи муносиб рақиб сифатида пайдо бўлди.
“Мен боксга қайтишга қарор қилдим. Чунки мен биринчи оғир вазн чемпиони бўлишни хоҳлайман. Дерек Чисора билан жанг қилишимни аввал ҳам айтганман”, — деди Фьюри.
У шунингдек, Чисорани эътибордан четда қолдирмаслик учун қўнғироқ қилишни ҳам унутмади.
“Ушбу хабар Дерек Чисорага қаратилган. Сиз трилогиядан қочяпсиз. Бу сизга карерангиздаги энг катта даромадни қўлга киритиш имконини беради. Сиз шартномани имзолашингиз лозим”, — деган “лўлилар қироли”.
“Тайсон, дўстим, бемаъни гапларни бас қилинг. Агар жанг қилишни хоҳласангиз ота-онам билан гаплашинг. Уларга мен билан жанг ўтказишни хоҳлаётганингизни айтинг. Шундан сўнг шартномани юборинг”, — дея Чисора ўзининг ижтимоий тармоқдаги саҳифасида Тайсонга шундай жавоб қайтарган.
Бундай жавобдан сўнг “лўлилар қироли” Усик ёки Жошуа вариантини танлашга киришди. Бироқ, иккала жангчи ҳам Фьюрининг чақириғини эътиборсиз қолдирганлиги сабабли, Тайсон яна Чисора билан куч синашишига тўғри келишини англаб етди.
Фьюри ва Чисора ўртасидаги қарама-қаршилик тарихи
Улар икки марта рингда учрашишган. Биринчи жанг 2011 йилнинг ёзида бўлиб ўтган. Ўша пайтда иккала британиялик боксчи умуман мағлуб бўлмаган ва келажаги порлоқ спортчилар экани бот-бот ОАВда бонг урилган. Ўша жангда Фьюри 118-111, 117-112, 117-112 ҳисобида бир овоздан ғалаба қозонди. Шундан сўнг Тайсоннинг карераси доимий равишда ўсиб борди ва у тез орада оғир вазн тоифаси қироли бўлди. Чисоранинг фаолияти эса аста-секинлик билан пастга тушди.
Бироқ, улар 2014 йил ноябрь ойида яна рингга кўтарилишди. Улар бир-бирларига кескин зарбалар бериб, учрашувни қизиқарли ўтишига сабаб бўлишди. Бироқ, Дерек яна муваффақиятсизликка учради. У мазкур жангдан сўнг бутун фаолияти давомида ўн иккинчи мағлубиятини тотиб кўрди.
Аммо Фьюри тўқнашувда қандай устунлик қилганини тушунишингиз учун бир нечта статистик ҳисоб-китоблар мавжуд. Улар умумий 22 раунд жанг қилишди. Зарбаларда Фьюри фақат биттасида Чисорага ютқазди. Аниқ зарбалар натижаси эса ҳайратланарли — 436-168.
Фьюри — Чисора тўқнашуви учун тахмин
Ўтган учрашувларга асосланилса, бу жангда “лўлилар қироли” аниқ фаворит. Қолаверса, бу устунлик шунчалик яққол кўриниб турибдики, букмекерлар унинг ғалабаси учун жуда катта ишонч билдиришмоқда. Чисоранинг йўқотадиган ҳеч нарсаси йўқ. Чунки у ҳам фаолиятининг сўнгги босқичида. Аммо боксчилар ўртасидаги фарқ шунчалик каттаки, Фьюри Дерекни Диллиан Уэйтдан осонроқ мағлуб этади. Эслатиб ўтамиз, Уэйт билан бўлган жанг олтинчи раундда якунига етган.