— Лас-Вегасдаги биринчи жангингиз фаолиятингизда қандай аҳамиятга эга?
— Ҳаммага салом. Бу унчалик катта воқеа эмас. Мен бу ерга ғалаба қозониш учун келдим. Абу-Дабими, Лас-Вегасми фарқи йўқ, менинг вазифам ғалаба қозониш.
—Лас-Вегасга келганингиздан сўнг Флойд Мейвезер билан учрашдингизми? Унинг Вегасдаги уйига бордингизми?
— Йўқ, балки жангдан кейин учрашармиз. Мен ҳозир фақат бўлғуси жангга этибор қаратаяпман. Флойд эса ҳозир Маямида.
—UFCда ҳозиргача 3-0 ҳисобини қайд этгансиз. Бунга қандай муносабатдасиз?
— Мен ҳозир ўзимнинг кейинги ғалабам ва бонусим томон кетяпман (кулиб қўяди). Албатта, бу ҳазил. Мен биринчи навбатда ғалаба қозонишни мақсад қилганман. Сабаби, мен илк марта тўлиқ кемпни ўтадим. Бундан олдинги учта жангимда жуда қисқа муддат тайёргарлик олиб борганман. Бир ҳафта, саккиз кун ва 20 кун. Ҳозир эса мен тўлиқ машғулотлар лагерини ўтадим. Рақибим яхши жангчи: кучли жуи-житсу устаси. Жанг “стойка”да кечади, деб ўйлайман.
— Жералд билан рақиб тушганингизда қандай хаёлларга бордингиз? Уни олдиндан билармидингиз ёки бу ким экан, деб ўйладингизми?
— Йўқ, мен уни олдиндан биламан. Чунки у Хамзат Чимаев билан ҳам жанг қилган. Жералдни бундан уч йил олдин, UFCга ўтмасимдан аввал кўрганман. Ўшанда у бир йигит билан жанг қилганди. Унинг жангини кўриб менежеримга шу йигит билан жанг қилишим керак дегандим. Қаранг, мана уч йилдан кейин биз UFCда рақиб бўлдик.
— Нега менежерингизга айнан Мёршарт билан жанг қилмоқчиман дедингиз?
— Чунки унинг услуби менга жуда мос эди. Уни албатта ютаман, деб ўйладим. Мёршарт кучли «ударник» эмас. Зарбалар борасида мен ундан устунроқман. Оёқ ҳаракатларим ҳам анча яхши. Гриплингим ҳам ёмон эмас. Яна кўрамиз.
— Мёршарт сизга қарши агрессив ҳаракат қилиши ва охиригача курашишини таъкидлади. Сиз уни шундай жанг қилишига ишонасизми?
— Марҳамат, мен ҳар қандай жангга тайёрман. Жанг қилиш менинг ҳаётим. Унга жуда қаттиқ тайёргарлик кўрганман.
— Кўпчилик сизни келажаги порлоқ жангчи, титул учун бўлажак номзод сифатида кўрмоқда. Сиз бунга қандай қарайсиз?
— Бу ҳамма спортчининг орзуси. Қолаверса, мен ватаним Ўзбекистон шарафини ҳимоя қиламан. Бизда ММА жуда тез ривожланяпти. Мамлакатимда янги промоушен ташкил қилдим. Ёш йигитлар учун бу жуда яхши бўлди.
— Сиз Ўзбекистонда жанглар ташкил қиляпсизми?
— Ҳа, мен Ўзбекистонда “кичик” Дана Уайтман. Сизлар Ўзбекистонга албатта боринглар. Эшикларимиз ҳамма учун очиқ.
— Охирги саволим. Бу жангда бизга нима ваъда қиласиз?
— Мен бу ерга фақат ғалаба учун келганман. Жангни муддатидан олдин тугатиш ниятидаман. Ўзимни яхши ҳис қиляпман. Мен сизларга бу сафар ҳақиқий Маҳмуд Мурадов ким экалигини кўрсатаман. Чунки бундан олдинги уч жангимга жуда қисқа муддатга келган эдим.
Жамшид Амиров тайёрлади.