Италиянинг Милан шаҳрида бўлиб ўтаётган Қишки Олимпия ўйинларига қарши минглаб одамлар норозилик намойишига чиқди. Намойишчилар Олимпиада билан боғлиқ экологик, иқтисодий ва ижтимоий оқибатларга эътироз билдириб, шаҳар кўчалари бўйлаб юриш уюштирди. Бу ҳақда Euronews хабар бермоқда.
Айрим намойишчилар полицияга қарата петарда ва турли буюмлар улоқтирган, бунга жавобан ҳуқуқ-тартибот идоралари сув пуркагичлардан фойдаланган. Тўқнашувлар оқибатида камида олти нафар намойишчи қўлга олингани маълум қилинди.
Намойишчилар Олимпия инфратузилмасини қуриш учун дарахтлар кесилгани, сунъий қор ишлаб чиқариш учун катта миқдорда сув ва энергия сарфланаётгани, шунингдек, уй-жой нархларининг кескин ошиб бораётганидан норози эканини билдирган.
Бундан ташқари, айрим иштирокчилар АҚШнинг Иммиграция ва божхона назорати хизмати (ICE) агентларининг Олимпиада хавфсизлигида иштирок этаётганига ҳам қарши чиққан.
Милан ва Кортина-дЪАмпеззо шаҳарларида ўтаётган XXV Қишки Олимпия ўйинлари 22 февралга қадар давом этади.