Бугун, 20 сентябрь куни Ўзбекистон президенти Шавкат Мирзиёев ва Тожикистон президенти Эмомали Раҳмон ўртасида телефон орқали мулоқот бўлиб ўтди. Бу ҳақда Тожикистон президенти матбуот хизмати маълум қилди.
Маълум бўлишича, суҳбат чоғида давлат раҳбарлари Самарқандда бўлиб ўтган Шанхай ҳамкорлик ташкилоти Саммити якунларини муҳокама қилдилар.
Тожикистон Президенти Ўзбекистон Республикаси Президентига самимий қабул ва анъанавий меҳмондўстлик учун миннатдорлик билдирди ҳамда давлат раҳбарларининг учрашуви якунлари бўйича қарор ва ҳужжатларнинг мустаҳкам пакети қабул қилинганини юқори баҳолади.
Шу билан бирга, Тожикистон президенти Ўзбекистон президентига тожик-қирғиз чегарасидаги вазиятнинг сўнгги ўзгаришлари ҳақида ҳам маълумот берди.
Томонлар стратегик шериклик ва иттифоқчилик доирасидаги дўстлик, яхши қўшничилик ва ўзаро манфаатли ҳамкорликка оид айрим долзарб масалаларни ҳам муҳокама қилдилар.