Кеча, 25 ноябрь куни Наманганда содир бўлган ЙТҲ натижасида Навоий вилояти ЙҲХБ ходими вафот этди. Бу ҳақида ЙҲХХ ахборот хизмати раҳбари Зойир Йўлдошев маълум қилди.
Қайд этилишича, воқеа соат 19:55 ларда Янги Наманган тумани И.Каримов кўчасида юз берган. 2007 йилда туғилган, ҳайдовчилик гувоҳномасига эга бўлмаган ҳайдовчи Onix русумли автомобилни катта тезликда бошқариб, тажрибасизлиги ва қоидаларни билмаслиги сабабли ўзи билан бир йўналишдаги автомобилни нотўғри қувиб ўтаётганда олдиндаги тартибга солинмаган пиёдалар ўтиш жойидан йўлни кесиб ўтаётган Навоий вилояти ИИБ ЖХХ ЙҲХБ ходими Дониёр Нуриллоевни уриб юборган.
Ҳодиса натижасида ходим олган оғир тан жароҳатлари сабабли воқеа жойида вафот этган.
Мазкур ҳолат юзасидан Янги Наманган тумани прокуратураси томонидан жиноят иши қўзғатилиб, дастлабки тергов ҳаракатлари олиб борилмоқда.
Қўшимча қилинишича, ЙПХ ходими Дониёр Нуриллоев Янги Наманган туманида жойлашган ИИВнинг госпиталига даволаниш учун борган.
“Ҳайдовчилик гувоҳномасига эга бўлмаган, йўл ҳаракати қоидаларини билмайдиган, тажрибасиз ва масъулиятсиз ҳайдовчи сабабли биз яна бир ходимдан айрилдик.
ИИВ ЖХД ЙҲХХ раҳбарияти ва шахсий таркиби ходимнинг оила аъзоларига чуқур ҳамдардлик билдиради”, дейилади хабарда.