"Бизда Россияга нисбатан икки хил муносабат бор: тийиб туриш-мудофаа ва мулоқот. Биз кучлибўлсак ва бирлаша олсак, Россия билан гаплашишимиз мумкин. Москва билан мулоқотни йўлга қўйишимиз керак, чунки биз янги совуқ уруш ва қуролланиш пойгасини истамаймиз. Бундан ташқари Россия бизнинг қўшнимиз. Шунинг учун у билан ҳамкорлик қилиш зарур",— дея қайд этди Столтенберг.
Бош котибнинг таъкидлашича, альянс Москвага нисбатан икки хил муносабатни давом этттиради. Россия билан кўплаб умумий масалалар, хусусан, қуролланиш устидан назорат бўйича мулоқот олиб бориш зарурлиги айтилган.
Столтенберг НАТОнинг Хитой билан муносабатларига тўхталиб ўтди. Унинг фикрича, Пекиннинг иқтисодий ўсиши ва ҳарбий имкониятларининг кенгайиши альянс учун ҳам чақириқ ҳисобланади.
"Хитойнинг ривожланиши иқтисодиёт ва савдо учун ижобий аҳамиятга эга. Шу билан бирга Пекиннинг ўсиши НАТО доирасидаги иттифоқчилар учун жиддий чақириқ бўлиб қолмоқда", — деган Столтенберг.
У Пекинни душман деб ҳисобламаслигини қайд этган. Шунингдек, НАТОнинг янги стратегик концепциясида Хитойга нисбатан аниқроқ позиция кўрсатилгани маълум қилинган. Столтенберг Хитой билан ҳам ҳамкорликни давом эттиришни муҳим ҳисоблайди. "Биз Хитой билан иқлим ўзгариши ва қуролланишни назорат қилиш бўйича ҳамкорликни давом эттирамиз", — деган у.
Бундан аввал "Осиё НАТОси" нинг Вашингтонда учрашгани ҳамда Столтенбергнинг НАТОни Афғонистондан кетиш сабабларини айтгани хабар қилинганди.
Жаҳонгир Қўзиев