Эрон зилзиладан жабр кўрган Сурияга инсонпарварлик ёрдами етказиб беришдан ҳарбий техникани ташиш учун ниқоб сифатида фойдаланган. Бу ҳақда Reuters агентлиги Эрон, Россия, Исроил ва Ғарб мамлакатларидаги тўққизта манбага таяниб, хабар берди.
Агентлик маълумотларига кўра, инсонпарварлик ёрдами ниқоби остида Эрон самолётлари томонидан Сурия аэропортларига етказилган техника ҳаво ҳужумидан мудофаа тизимини мустаҳкамлаш ва Суриядаги Эрон нишонларига Исроил томонидан берилган ҳужумларни қайтариш учун ишлатилган. Ускуналар қуруқлик орқали ҳам етказиб берилди.
Реутерс манбаларининг таъкидлашича, Эрондан Сурия ҳудудига етказилган юклар алоқа тизимлари, радар қурилмалари, ҳаво ҳужумидан мудофаа ракета қурилмаларининг қисмлари бўлган.
Эслатиб ўтамиз, 8 апрель куни Исроилнинг шимолий ҳудудлари Суриядан ракета зарбаларига учраган эди.
Айни пайтда Politico сайти Эрон халқаро санкцияларни четлаб ўтиб, баллистик ракета ёқилғисининг асосий компонентини сотиб олиш бўйича Россия ва Хитой билан музокаралар олиб бораётгани ҳақида хабар берди.