Иқлим офатлари, жумладан, экстремал тошқинлар, иссиқлик тўлқинлари ва қурғоқчилик 2022 йилда миллионлаб одамларга таъсир кўрсатди ва миллиардлаб доллар зарар келтирди. Жаҳон метеорология ташкилоти маълумотларига кўра, буларнинг барчаси инсоннинг зарарли фаолияти натижасида келиб чиқадиган иқлим ўзгариши таъсирининг кучайиб бораётганидан далолат беради.
Ташкилот экспертлари янги ҳисоботда иссиқхона газлари чиқиндиларини камайтириш ва бу жараён мониторингини сезиларли даражада яхшилаш учун кўпроқ иш қилиш зарурлигини таъкидлашган. Бундан ташқари, ЖМТ иқлим ўзгаришига мослашиш учун қўшимча маблағ ажратишни тавсия қилган.
Сўнгги саккиз йил рекорд даражадаги энг иссиқ йил бўлди. Ла Нина ҳодисасининг совутиш эффекти кетма-кет учинчи йил давом этаётгани 2022 йил рекорд даражадаги энг иссиқ йил бўлмаслигини англатади. Яъни сайёрада ҳарорат йилдан-йилга кўтарилиб бораверади.
"Бу йил биз кўплаб одамларнинг ҳаётига зомин бўлган ҳамда озиқ-овқат, энергия ва сув хавфсизлиги ҳамда инфратузилмага путур етказган бир қатор драматик об-ҳаво ҳодисаларини бошдан кечирдик", — деди ташкилот Бош котиби профессор Петтери Таалас.
Профессорнинг қайд этишича, Покистон ҳудудининг учдан бир қисми сув остида қолган, бу эса катта иқтисодий йўқотишларга ва қурбонларга олиб келган. Хитой ва қатор Европа мамлакатларида, Шимолий ва Жанубий Америкада рекорд даражадаги иссиқлик тўлқинлари кузатилди. Африкада узоқ давом этган қурғоқчилик ортидан минтақага гуманитар ҳалокат таҳдид солмоқда.
Профессор Тааласнинг ишончи комилки, халқаро ҳамжамият экстремал об-ҳаво ҳодисаларига тайёрлигини ошириши ва БМТнинг “Ҳамма учун эрта огоҳлантириш” мақсади яқин беш йил ичида бажарилишини таъминлаши керак.
Глобал мониторинг ва тизимларга инвестицияларни кўпайтириш ҳамда экстремал об-ҳаво ва иқлим ҳодисаларига чидамлиликни ошириш Жаҳон Метеорология Ташкилотининг 2023 йилдаги устувор вазифаларидан бири бўлади.