Айни кунларда Тошкент спорт соҳасидаги нуфузли халқаро тадбирларга мезбонлик қилмоқда. Жумладан, бугун World Aquatics — Бутунжаҳон сузиш федерацияси Ижроия қўмитаси Бюросининг навбатдаги йиғилиши бўлиб ўтди.
Мазкур тадбир доирасида World Aquatics Президенти, Осиё Олимпия кенгаши Бош директори Ҳусайн Ал Мусаллам бошчилигидаги делегация Олимпия шаҳарчасига ташриф буюрди. Делегацияга World Aquatics Ижроия қўмитаси Бюроси аъзоси Шаҳноза Мирзиёева, Спорт вазири Адҳам Икрамов, Ўзбекистон сузиш федерацияси раиси Қудратилла Рафиқов ҳамда бошқа расмийлар ҳамроҳлик қилди.
Меҳмонлар Олимпия шаҳарчасидаги сув спорти турларига мўлжалланган замонавий иншоот билан таништирилди. Ташриф давомида ушбу мажмуада машғулот олиб бораётган спортчилар билан ҳам мулоқот қилинди.
Тадбирда фахрий меҳмон сифатида АҚШ Президентининг глобал шерикликлар бўйича махсус вакили Паоло Замполли ҳамда Осиё Паралимпия қўмитаси президенти Мажид Рашид ҳам иштирок этди.
Сув спорти иншооти ҳақида маълумот берилар экан, мазкур мажмуада бир вақтнинг ўзида сузиш ва сувга сакраш каби спорт турлари бўйича машғулотларни халқаро талаблар асосида узлуксиз ташкил этиш имконияти мавжудлиги алоҳида таъкидланди.
Тадбир давомида Олимпия шаҳарчаси ҳудудида World Aquatics'нинг минтақавий марказини очиш маросими ҳам ўтказилди. Ушбу марказ минтақада сув спорти турларини ривожлантириш, спортчилар тайёрлаш ва халқаро ҳамкорликни мустаҳкамлашга хизмат қилиши қайд этилди.
Олимпия шаҳарчаси спорт мажмуаси меҳмонларда юқори таассурот қолдирди. Келгусида нуфузли халқаро мусобақаларни айнан шу масканда ташкил этиш бўйича таклифлар ҳам муҳокама қилинди.