Ижтимоий тармоқларда Олий судда кадрларни ишдан бўшатиш, бутун бошли бир бошқарманинг барча ходимлари ишдан олингани тўғрисида тарқалган хабарларга Олий суд матбуот хизмати муносабат билдирди.

 

Муносабатда Олий судда турли бошқарма ва бўлимларда турфа лавозимларда (судьялар эмас) фаолият олиб  борган 11 нафар ходим судья бўлиш истагида имтиҳонлардан муваффақиятли ўтиб, Судьялар олий мактабига ўқишга қабул қилингани қайд этилган.

 

Яъни, нафақа ёшидаги 7 нафар ходим (4 нафари Мурожаатлар билан ишлаш бошқармасидан, 3 нафари эса бошқа бошқарма ва бўлимлардан) ўз хоҳишига кўра лавозимидан озод этиш тўғрисидаги ариза билан мурожаат қилган. Шу муносабат билан улар билан тузилган меҳнат шартномаси бекор қилинган.

 

Хусусан, муносабатда судьяларни сайлаш (тайинлаш) ва уларнинг ваколатини тугатиш масаласи Олий суд ваколатига кирмаслиги, ҳозирда мавжуд бўш (вакант) иш ўринларини ёш ва малакали мутахассислар билан тўлдириш юзасидан зарур чоралар кўрилаётганлиги маълум қилиниши таъкидланган.