Омбудсманнинг фаолиятидан сенаторлар қониқдими?

 

Мазкур масала юзасидан Омбудсман Феруза Эшматова сўзга чиқди.

 

Таъкидланишича, Омбудсман ва унинг минтақавий вакиллари томонидан 9 та асосий йўналишлар бўйича ишлар амалга оширилган.

 

Сенаторлар томонидан Омбудсманга келиб тушган ижтимоий, иқтисодий ва экологик ҳуқуқлар билан боғлиқ мурожаатлар ўтган йилга нисбатан камайган бўлса-да, фуқароларнинг шахсий ҳуқуқ ва эркинликлари билан боғлиқ мурожаатлар сони ошганлиги қайд этилди.

 

Бундан ташқари, мурожаатлар тўлиқ, холисона ва чуқур кўриб чиқилмаганлиги, унга юзаки ёндашилганлиги ҳамда мурожаат муаллифларига жавоб хатлари ўз вақтида юборилмаганлиги оқибатида ҳисобот даврида келиб тушган мурожаатларнинг 4 655 таси ёки 25 фоизини такрорий мурожаатлар ташкил қилгани танқид қилинди. Бу кўрсаткич ўтган йилга нисбатан 2 бараварга кўпайган.

 

2021 йилда Омбудсман томонидан тегишли давлат органлари ва ташкилотларга киритилган жами 94 та таъсир чоралардан (хулоса, тақдимнома ва даъво ариза) фақат 58 таси (61 фоизи) қаноатлантирилган. Аммо қолган таъсир чораларининг тўлиқ ечими таъминланмаганлиги, бунда Омбудсман томонидан Олий Мажлис палаталарининг парламент назорати институтидан етарли фойдаланмагани қайд этилди.

 

Шу билан бирга, ҳаракатланиш эркинлиги чекланган шахсларни қийноққа солиш ва камситувчи муомалада бўлиш бўйича ўтказилган мониторингнинг натижадорлиги етарли эмаслиги ҳам кўрсатиб ўтилди.

 

Шунингдек, мажлисда сенаторлар томонидан Омбудсманга фуқароларнинг мурожаатларини холисона кўриб чиқиш ҳамда муаллифларга ўз вақтида ва асосли жавоб бериш орқали такрорий мурожаатлар сонини камайтиришга, вазирлик, давлат идоралари ҳамда нодавлат ташкилотлари билан биргаликда маҳаллаларда фуқароларни ҳуқуқий маданияти ва билимларини оширишга қаратилган тадбирларни амалга ошириш ҳамда мурожаатларда қайд этилган муаммоларни жойида ҳал этиш борасида тегишли тавсиялар берилди.

 

Мазкур масала юзасидан Сенатнинг тегишли қарори қабул қилинди.