Оқ уй ўзининг расмий ижтимоий тармоқларида АҚШ президенти Доналд Трамп ва португалиялик футболчи Криштиану Роналду ўртасидаги учрашув акс этган видеони эълон қилди. Кадрларда Роналду турмуш ўртоғи Жоржина билан Оқ уй коридорида кетаётган ва Трамп билан самимий суҳбат қилаётганини кўриш мумкин.
Пост остида “Тарихдаги энг буюк икки шахс. СР7 х 45/47” деган изоҳ қолдирилган. Унда Роналдунинг машҳур 7-рақамига, шунингдек, Трампнинг АҚШнинг 45 ва ҳозирги 47-президенти сифатидаги мақомига ишора қилинган. Бу пост ижтимоий тармоқларда катта муҳокама уйғотди.
Роналду аввалроқ Трамп томонидан Оқ уйда ташкил этилган кечки овқатда ҳам иштирок этганди. Тадбирда Саудия Арабистони валиаҳд шаҳзодаси Муҳаммад бин Салмон, ФИФА президенти Жанни Инфантино ва тадбиркор Илон Маск ҳам меҳмон бўлган. Трамп эса суҳбат давомида ўғли Барроннинг Роналдуга бўлган катта муҳаббатини ҳазил аралаш тилга олиб, “Эҳтимол, сиз билан танишганидан кейин у отасини бир оз кўпроқ ҳурмат қилса керак”, дея кулгу уйғотган.