Ўзбекистон Бразилиянинг Embraer компаниясидан C-390 Millennium русумли ҳарбий-транспорт самолётларини харид қилади. Бу ҳақда 3-февраль куни Сингапурда ўтказилган авиашоуда расман эълон қилинди. Аввалроқ номи ошкор этилмаган буюртмачи сифатида тилга олинган мамлакат айнан Ўзбекистон экани тасдиқланди.
Маълум қилинишича, Ўзбекистон ушбу ҳаво кемаларидан юк ва шахсий таркибни ташиш, тиббий эвакуация, десант амалиётлари ҳамда гуманитар ва фавқулодда вазиятларда, жумладан, ўрмон ёнғинларини ўчиришда фойдаланади. Харид эскириб бораётган Il-76 самолётлари паркини босқичма-босқич янгилаш имконини беради.
Embraer президенти Боско да Коста Жуниорнинг таъкидлашича, Ўзбекистон Марказий Осиёда C-390 Millennium'ни танлаган илк оператор бўлиб, бу икки томонлама ҳамкорликни янада мустаҳкамлашга хизмат қилади.