Ўзбекистон Жаҳон савдо ташкилотига (ЖСТ) аъзо бўлиш жараёнида деярли маррага етди. Ҳозирча фақат Тайван билан икки томонлама музокараларни якунлаш талаб этилмоқда. Бу ҳақда президентнинг ЖСТ масалалари бўйича махсус вакили Азизбек Урунов маълум қилди. Унинг айтишича, мамлакат 2026 йил давомида ташкилотга тўлиқ аъзо бўлишни мақсад қилган.
Урунов 2025 йил Ўзбекистон учун қоидаларга асосланган халқаро савдо тизимига интеграция йўлида бурилиш нуқтаси бўлганини таъкидлади. Унинг сўзларига кўра, очиқликни кучайтириш, савдо сиёсатини халқаро стандартларга мослаштириш ва институционал ислоҳотлар фаол давом эттирилган. “Йўл давом этмоқда — мазмун, нуфуз ва суръат билан”, дея хулоса қилди у.
Маълумотларга кўра, Ўзбекистон ҳозиргача ЖСТга аъзо 34 давлатдан 33 таси билан икки томонлама бозорга кириш бўйича музокараларни тўлиқ якунлаган. Улар орасида Европа Иттифоқи, Хитой, Россия, Буюк Британия, Швейцария, Канада ва Австралия каби йирик савдо ҳамкорлари бор. Тайван билан келишув имзоланса, музокара жараёни расман якунланади.
Шу билан бирга, ЖСТ талабларига мослашиш доирасида кенг кўламли ҳуқуқий ислоҳотлар амалга оширилди. Жумладан, 30 дан ортиқ норматив-ҳуқуқий ҳужжат қабул қилинди, яна 29 та ҳужжат лойиҳаси тайёрланди. Ислоҳотлар божхона тартиб-таомиллари, экспорт божлар, техник регламентлар, интеллектуал мулк ҳуқуқлари ҳамда санитария ва фитосанитария талабларини қамраб олди. Режага кўра, барча жараёнлар 2026 йил март ойида бўлиб ўтадиган ЖСТ Вазирларининг 14-конференциясига қадар якунланиши кутилмоқда.