Ўзбекистон Республикаси Вазирлар Маҳкамаси транспорт инфратузилмасидаги объектлар номларини давлат тили қоида ва меъёрларига мослаштириш бўйича қарор қабул қилди. Ушбу қарор аэропортлар, автовокзаллар ва автотураргоҳлар номларини миллий тил талабларига мувофиқлаштириш ва ягона ахборот муҳитини яратишни назарда тутади.
Қарорга мувофиқ, мавжуд 161 та аэропорт, автовокзал ва автотураргоҳ номлари давлат тили қоидаларига мослаштирилади. Шунингдек, янги ном бериладиган 21 та объект рўйхати тасдиқланди. Бу чора транспорт инфратузилмасида номланишдаги турли хилликларни бартараф этишга хизмат қилади.
Хусусан, Тошкент шаҳридаги Яшнобод туманидаги Тошкент—Шарқий аэропорти Тошкент—Ҳумо номи билан қайта номланди. Ушбу аэропортнинг биринчи меҳмони 2025 йил ноябрь ойида Қозоғистон Президенти Қосим-Жўмарт Тўқаев бўлган эди.
Қарорга мувофиқ, Транспорт вазирлиги, Узбекистан Аирпортс, Узбекистан Аирвайс, Кадастр агентлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари уч ой муддатда барча номларни мослаштиради.
Аэропортлар, вокзаллар ва автотураргоҳлардаги пешлавҳалар ва ахборот кўрсаткичлари давлат тили қоидаларига мос, лотин ёзувига асосланган ўзбек алифбосида бўлиши таъминланади.
Автовокзал ва автотураргоҳларга ном бериш ҳамда уларни ўзгартириш Вазирлар Маҳкамаси томонидан амалга оширилади.