Амалдаги қонунчиликка мувофиқ, етим болалар ҳамда ота-она қарамоғидан маҳрум бўлган болаларни аниқлаш, уларни муқобил жойлаштириш шаклларига йўналтириш ва ҳисобга олиш тартиби белгиланган. Ушбу тартиб асосида ҳисобга олинган болалар белгиланган қоидаларга мувофиқ фарзандликка олиниши мумкин. Бу ҳақда Адлия вазирлиги хабар берди.
Қонун ҳужжатларида фарзандликка олиниши мумкин бўлган болаларнинг аниқ тоифалари белгилаб қўйилган. Жумладан, қуйидаги ҳолатларда болалар фарзандликка берилади:
— ота-онаси вафот этган болалар;
— ота-онаси ота-оналик ҳуқуқидан маҳрум этилган болалар;
— ота-онаси суд қарори билан муомалага лаёқатсиз деб топилган болалар;
— ота-онаси болани тарбиялаш ёки унинг ҳуқуқ ва қонуний манфаатларини ҳимоя қилишдан бўйин товлаган болалар;
— ота-онаси бир йилдан ортиқ муддат давомида узрли сабабларсиз болалар муассасалари ёки тиббий муассасалардаги боласидан хабар олмаган болалар;
— ота-онаси тарбиялаш, даволаш ёки аҳолини ижтимоий ҳимоялаш муассасаларидан боласини олишдан бош тортган болалар;
— ота-онаси бедарак йўқолган ёки суд тартибида вафот этган деб эълон қилинган болалар.
Мутахассислар таъкидлашича, мазкур ҳуқуқий асослар болаларнинг қонуний манфаатларини ҳимоя қилиш, уларни барқарор ва соғлом оила муҳити билан таъминлашга хизмат қилади.