Кавказ ҳудудларидан Ўзбекистонга нисбатан бироз салқин ҳаво кириб келиши ҳисобига 20 июндан бошлаб иссиқ бироз пасаяди. Натижада ҳаво ҳарорати иш ҳафтасининг охиригача 33-38 даража атрофида бўлади. Республиканинг жанубий ҳудудларида иссиқ ҳаво массасининг таъсири сақланиб туради. Ҳарорат асосан 39-41 даража, Сурхондарё вилоятида ҳафта ўртасига келиб, баъзи жойларда 42-44 даражагача бўлади.
«Шунингдек, 20 июнда Фарғона водийси вилоятларида, Тошкент вилоятининг баъзи жойларда қисқа муддатли ёмғир ёғиши, момақалдироқ бўлиши мумкин. Ҳафтанинг биринчи ярмида об–ҳавонинг беқарорлиги республиканинг тоғ олди ва тоғли ҳудудларида сақланиб туради – баъзи жойларда қисқа муддатли момақалдироқли ёмғирлар ёғади. Бугун куннинг иккинчи ярмида ва эртага баъзи жойларда ёмғир кучли ёғади, дўл ёғиши эҳтимолдан ҳолис эмас», — дейилади «Ўзгидромет» хабарида.
Қайд этилишича, 19-20 июнь кунлари республика бўйича баъзи жойларда, 23 июнда жанубда ва чўл ҳудудларда шамолнинг кучайиши, айрим жойларда чанг-тўзон билан кузатилиши кутилмоқда.
Тошкент шаҳрида ҳаво ҳарорати иш ҳафтасининг охиригача 35-37 даража атрофида бўлади.