Ўзбекистонда 2026 йилдан бошлаб янги қуриладиган турар жой мажмуалари ва бошқа объектларга фақат давлат тилида ном берилади. Бу тартиб Вазирлар Маҳкамасининг жорой йилнинг 22 октябрдаги қарори билан тасдиқланган.
Қарорга мувофиқ, 2026 йил 1 январдан эътиборан барча турар жой лойиҳалари ва қурилиш объектларининг номлари, шунингдек, бино паспортлари, пешлавҳалар, реклама ва эълонлар матнлари ўзбек тилида, давлат тили меъёрларига қатъий риоя этилган ҳолда ёзилиши шарт бўлади.
Шунингдек, қурилиш жараёнига оид барча техник, муаллифлик ва назорат ҳужжатлари тегишли ҳудудий инспекцияларга давлат тили талабларига мос тарзда тақдим этилиши белгиланди.
Ҳужжатда, шунингдек, “E-XSUD” ва экология йўналишидаги рухсатномалар тизимларини Кадастр агентлигининг “Кадастр ва рўйхатдан ўтказиш интеграциялашган ахборот тизими” ҳамда “Шаффоф қурилиш” платформаси билан боғлаш вазифаси юклатилган.
Мазкур қарор расмий эълон қилинган санадан уч ой ўтиб кучга киради.