Ўзбекистонда шантаж қилиш йўли билан ўсмирлардан пул ундириб келган канални Телеграм блоклади. Бу ҳақда “Podrobno.uz” сайти хабар берди.
Маълум қилинишича, Телеграм-каналнинг асосий мақсади мактаб ўқувчилари ва ўсмирлардан пул ундириш бўлган. Канал админлари ўсмирларнинг ижтимоий тармоқлардаги профилларидан олинган ҳақиқий суратларини каналга жойлаштириб, уларнинг тагига суратдагилар ноанъанавий йўналиш вакиллари ёки ижтимоий масъулияти паст шахслар экани ҳақида изоҳлар қолдирган. Кейин ушбу пост ҳаволасини (линкини) 150 минг сўм эвазига ўчириш таклифи билан сурат эгасига юборган.
Миллий масс-медиани қўллаб-қувватлаш ва ривожлантириш жамоат фонди матбуот котиби маълум қилишича, фонд дарҳол Телеграм асосчиси Павел Дуров билан боғланиб, канални блоклаб қўйишни сўраган.
Фонд Павел Дуровга кибербуллингнинг олдини олишда шахсий иштироки, тезкор ёрдами ва қўллаб-қувватлаши учун миннатдорчилик билдирган.
Аввалроқ Павел Дуровнинг Бразилия Олий судига Телеграмни блокламаслиги ҳақида мурожаат йўллагани хабар қилинганди.