Оқ уй матбуот котиби Кэролайн Ливиттнинг маълум қилишича, Россия президенти Владимир Путин, АҚШ президенти Дональд Трампдан Аляскада ўтказилиши режалаштирилган учрашувга Украина президенти Владимир Зеленскийни таклиф қилмасликни сўраган. Ливиттнинг сўзларига кўра, Трампнинг учрашувдаги асосий мақсади — Украина тинчлиги масаласида Россиянинг позициясини яхшироқ тушуниш.
Унинг таъкидлашича, Дональд Трамп Россия билан икки томонлама муносабатларни муҳокама қилишдан ташқари, учрашувни асосан Украинада урушни тўхтатиш масаласига бағишламоқчи. Шунингдек, Трамп келажакда АҚШ, Россия ва Украина етакчилари иштирокида уч томонлама саммит ўтказилишига умид қилмоқда.
Президент Зеленский эса уч томонлама учрашув режалаштирилганини тасдиқлаб, лекин унинг санаси ҳали белгиланмаганини айтди. У, шунингдек, “Украинасиз Украина бўйича ҳеч қандай қарор қабул қилинмайди” дея таъкидлади ва АҚШ президенти бuni тушунишига ишонч билдирди.
Ливиттнинг сўзларига кўра, Дональд Трамп урушни тугатиш ва одамлар ўлимини барҳам беришга қатъий қарор қилган. Трамп келажакда Россияга ташриф буюриши ҳам мумкинлиги айтилаётгани маълум қилинди.