АҚШ президенти Доналд Трамп Россия президенти Владимир Путин ва Украина президенти Владимир Зеленский ўртасидаги эҳтимолий учрашув катта натижаларга олиб келмаслиги мумкинлигини таъкидлади. Бу ҳақда “ТАСС” агентлиги хабар берди.
“Биласизми, танго учун икки киши керак. Мен уларнинг ҳар иккаласи билан учрашишни истагандим. Балки мен ҳам ўша ерда бўлишим керакдир. Аммо кўпчилик бу учрашувдан жиддий натижа чиқмайди, деб ўйлайди. Улар: ‘сиз ҳам ўша ерда бўлишингиз керак’, дейди. Балки тўғридир, балки йўқдир”, — деди Трамп.
Шунингдек, Оқ уй раҳбари яқин икки ҳафта ичида Россия ва Украина ўртасидаги можаро қандай ривожланишини кузатишини маълум қилди.
“Мен бу урушдан ҳеч қачон мамнун эмасман. Умуман олганда, мен мутлақо хурсанд эмасман. Келгуси икки ҳафта ичида вазият қайси йўналишда ўзгаришини кўрамиз”, — деди у Оқ уйда журналистлар саволларига жавоб берганида.