ФВВ хабарига кўра, 22 июль куни соат 03:20 да А-373 «Тошкент-Ўш» автомобиль йўлининг «Резак» туннелида «Водий-Тошкент» йўналишида ҳаракатланиб кетаётган «Isuzu» юк автомобили ҳайдовчиси бошқарувни йўқотиб туннель деворига урилиши оқибатида ёнғин юзага келган.
Натижада воқеа жойига Қамчиқ довонидаги ФВВ қутқарувчиларининг 13 нафари, 2 та ёнғин-қутқарув экипажи ва қутқарув отрядидан 1 та техника соат 03:22 да етиб борган ва ёнғин соат 03:27 да ўчирилган. Шундан сўнг соат 03:50 да юк автомобили туннелдан олиб чиқилган.
Қайд этилишича, «Isuzu» юкхонасидаги жами 4,2 тонна юкнинг 95 фоизи ёнғиндан сақлаб қолинган. Содир бўлган ёнғин оқибатида тан жароҳати олган ва ҳалок бўлганлар йўқлиги маълум қилинган.