Қашқадарё вилоятида ижтимоий ҳимояга муҳтож, эҳтиёжманд оилалар фарзандлари бўлган талаба қизларнинг олий таълим олишини қўллаб-қувватлаш бўйича муҳим қарор қабул қилинди. Вилоят ҳокими Муротжон Азимов томонидан имзоланган қарор талаба қизларнинг таълим олишига кенг имконият яратишга қаратилган.
Қарорга кўра, ота-она қарамоғидан маҳрум бўлган, етим ёки ижтимоий жиҳатдан ҳимояга муҳтож оилаларда вояга етган 134 нафар талаба қизнинг олий таълим муассасаларида ўқиши учун тўлов-шартнома пуллари қоплаб берилади.
Мазкур мақсадлар учун вилоят бюджетидан қарийб 1 миллиард 128 миллион сўм маблағ ажратилган. Бу ёрдам талаба қизларнинг ўқишни давом эттириши ва келажакда малакали мутахассис бўлиб етишишига хизмат қилади.
Таъкидланишича, бундай ташаббуслар ҳудудда хотин-қизларнинг билим олиши, ижтимоий фаоллигини ошириш ва тенг имкониятларни таъминлашга қаратилган тизимли ишларнинг муҳим қисми ҳисобланади.