ИИВ киберхавфсизлик маркази томонидан Telegram'да Hello Tashkent, salam Tashkent номли гуруҳ ва каналларни ташкил этиб, тармоқ фойдаланувчиларининг шаъни ва қадр-қимматини камситувчи видео ва фотоларни жойлаштириб келган жиноий гуруҳ қўлга олинди.
Аниқланишича, мазкур гуруҳ ташкилотчилари Telegram'даги очиқ гуруҳларга қизлар ва аёлларни фото ва видеоларини жойлаб, қизиқувчиларни вибчатга таклиф қилишган. Вибчатга аъзо бўлиш эса 100 минг сўмдан 500 минг сўмгача этиб белгиланган. Улар қиз ва аёлларнинг фото ва видеоларини ўчириб юбориш эвазига товламачилик йўли билан пул талаб қилишган.
Тезкор-қидирув ишлари натижасида ушбу фаолият билан шуғулланиб келган шахслар қўлга олинди. Ҳолат юзасидан Жиноят кодексининг 165-моддаси 2-қисми "в" банди билан жиноят иши қўзғатилиб, гумонланувчиларга нисбатан қамоққа олиш тарзидаги эҳтиёт чораси қўлланилган. Ҳозирда мазкур жиноий гуруҳга алоқадор бўлган бошқа шахсларни аниқлаш ишлари олиб борилмоқда.
"Hello Tashkent, salam Tashkent гуруҳларидан жабрланган фуқаролар "102" ёки +99899 117 60 87 рақамига хабар беришларини сўраймиз. Маълумот берган фуқароларнинг шахси сир сақланади", - дейилади хабарда.