Фарғона вилояти Ички ишлар бошқармаси Қўқон шаҳрида оммавий тартибсизлик бўлгани ҳақидаги ижтимоий тармоқларда тарқалган хабарларга расмий муносабат билдирди. Қайд этилишича, мазкур маълумотлар ҳақиқатга тўғри келмайди.
Маълум бўлишича, 2025 йил 31 декабрь куни соат 23:55 да Қўқон шаҳар А. Чархий кўчасида шу ҳудудда яшовчи фуқаролар Янги йил байрамини нишонлаш мақсадида йўлнинг қатнов қисмига чиқиб, мушакбозлик уюштирмоқчи бўлган.
Ҳуқуқни муҳофаза қилувчи органлар томонидан ўз вақтида кўрилган чоралар натижасида жамоат тартиби ва ҳаракат хавфсизлиги таъминланган. Ҳуқуқбузарларнинг шахси аниқланиб, уларга нисбатан белгиланган тартибда ҳужжатлар расмийлаштирилган.
Шунингдек, расмий хабарда ижтимоий тармоқларда тарқалган айрим ахборотларда қайд этилганидек, автомашина ёқиб юборилганлиги ҳолати содир бўлмагани алоҳида таъкидланган. Фарғона вилояти ИИБ фуқароларни текширилмаган ва асоссиз хабарларга ишонмасликка чақирди.