9 январдан Африкалар Кубоги старт олди. Унда 24 та жамоа ғолиблик учун кураш олиб бормоқда.
Маълумот учун: Ушбу мусобақа 1957 йилдан буён ўтказилиб келинади. Биринчи турнир Судан давлатида ташкил этилган бўлиб, унда Миср, Судан ва Эфиопия жамоалари иштирок этган. Натижада, финал учрашувида Миср терма жамоаси Эфиопияни 4:0 ҳисобида мағлуб этиб, ғалабани қўлга киритган. Ушбу турнирда энг кўп ғалаба қозонган ҳам Миср термаси ҳисобланади. Мисрликлар 7 бор мусобақа бош совринига эга чиқишган. 2019 йил бўлиб ўтган сўнгги Африка Кубогининг финал учрашувида Жазоир ва Сенегал жамоалари ўзаро тўқнаш келган. Натижада, жазоирликлар 1:0 ҳисобида ғалаба қозониб, бош совринни қўлга киритган.
Бу галги мусобақага Камерун давлати мезбонлик қиляпти. Ҳозирда чемпионатнинг биринчи тур ўйинлари давом этмоқда.
А гуруҳи:
Ушбу гуруҳда Камерун, Эфиопия, Кабо-Верде ва Буркина-Фасо терма жамоалари жой олган. 9-10 январь кунлари гуруҳнинг биринчи тур ўйинлари бўлиб ўтди. Унда Камерун Буркина-Фасо билан баҳс олиб борган бўлса, Эфиопия Каво-Верде билан тўқнаш келди. Камерун – Буркина Фасо ўйинида мезбонлар ҳисобда орқада боришига қарамай, Венсан Абубакарнинг пенальтидан киритган иккита голи эвазига 2:1 ҳисобида ғалаба қозонди. Гуруҳнинг иккинчи учрашувида Кабо- Верде термаси кичик ҳисобдаги ғалабани қўлга киритди. Ўйиннинг 12-дақиқасида Эфиопия термаси аъзоси Яред Бае қизил карточка олиб майдонни тарк этди. Шу тариқа кабо-верделикларда ўйинни ўз фойдаларига ҳал қилишга яхши имконият пайдо бўлди. Биринчи турдан сўнг гуруҳда мезбонлар биринчи ўринни эгаллаб турибди. Иккинчи поғонада Кабо-Верде термаси бормоқда. 3-4-ўринлардан Эфиопия ва Буркина-Фасо жамоалар жой олган.
Б гуруҳи:
Б гуруҳининг биринчи тур ўйинлари кеча бўлиб ўтди. Мазкур гуруҳдан Сенегал, Зимбабве, Гвения ҳамда Малави термалари ўрин олган. Гуруҳнинг дастлабки ўйини Сенегал ва Зимбабве ўртасида ўтказилди. Муросасиз ўтган ўйинда жамоа етакчиси Садио Маненинг 90+7-дақиқада киритган голи эвазига Сенегал ўйинни ўз фойдасига ҳал қилди. Гуруҳдаги иккинчи баҳсда Гвения 35-дақиқада Исциага Силла киритган гол ҳисобига Малавидан устун келди ва уч очкони қўлга киритди. Б гуруҳида Сенегал ва Гвения уч очко жамғарган ҳолда пешқадам бўлиб турибди. Кейинги 3 ва 4-ўринни Зимбабве ва Малави термалари эгаллаган.
C гуруҳи:
Бу гуруҳда Габон, Марокаш, Комор ороллари ҳамда Гана термаси пешқадамлик учун курашни бошлади. Ушбу гуруҳда ҳам кеча мусобақанинг дастлабки ўйинлари ўтказилди. Унда Марокаш Гана билан Комор ороллари эса Габон билан баҳс олиб борди. Марокаш футболчиси Софиан Буфалнинг 83-дақиқада киритган голи марокашликларнинг Гана устидан ғалаба қозонишига замин яратди. Комор ороллари Габон тўқнашувида габонликлар кичик ҳисобда рақибидан устун келди. Ҳозирда бу гуруҳда Марокаш ва Габон термаси пешқадамлик қилаётган бўлса, кейинги ўринларни Комор ороллари ҳамда Гана жамоалари эгаллаган.
Д гуруҳи:
Африка Кубогининг Д гуруҳидан Нигерия, Гвения-Бисау, Судан ҳамда Миср термалари жой олган. Ушбу гуруҳнинг биринчи ўйини кеча Нигерия ва Миср ўртасида бўлиб ўтди. Кескин ва муросасиз кечган баҳсда Нигерия 1:0 ҳисобидаги ғалабани қўлга киритди. “Ливерпул” юлдузи Муҳаммад Салоҳ бошчилигида Миср жамоаси биринчи ўйиндаёқ мағлубият аламини тортиб кўрди. Мазкур гуруҳнинг иккинчи ўйини бугун бўлиб ўтади. Унда Гвения-Бисау ҳамда Судан баҳс олиб боради.
Э гуруҳи:
Мусобақанинг бу гуруҳида Жазоир, Серра-Леоне, Кот-дъИвуар ҳамда Экватириал жамоалари ўрин олган. Кеча бўлиб ўтган гуруҳнинг биринчи ўйини дуранг натижа билан якунланди. Унда Жазоир ва Серра-Леоне жамоалари тўқнаш келди. Бугун Кот-дъИвуар Экватириал иштирокидаги гуруҳнинг иккинчи беллашуви бўлиб ўтади.
Чемпионатнинг Ф гуруҳи жамоалари иштирокидаги ўйинлар ҳам бугун ўтказилади. Ушбу учрашувларда Мавритания Гамбияга, Тунис эса Малига қарши майдонга тушади.
Эслатиб ўтамиз, Африка Кубоги 7 февралга қадар давом этади.
Жамшидбек Амиров