Туркистон вилояти суди томонидан Ўзбекистон ҳудудига ноқонуний ёқилғи етказиб беришда айбланган беш нафар шахсга нисбатан ҳукм ўқилди, дея хабар берди nur.kz нашри.
Суд материалларига кўра, айбланувчилар Сариоғаш туманида 375 метр узунликдаги махфий ер ости туннелини ётқизиб, у орқали 2024 йил август–декабрь ойларида жами 420 тоннадан ортиқ АИ-92 бензинни Ўзбекистонга ноқонуний тарзда ўтказган. Ушбу фаолият оқибатида давлатга 112 миллион тенге (қарийб 2 миллиард сўм) миқдорида зарар етказилган.
Суд қарорига мувофиқ, жиноий гуруҳ ташкилотчиси 15 йил муддатга, қолган иштирокчилар эса 13 йилдан озодликдан маҳрум этилди. Шунингдек, айбланувчиларнинг мулклари – 3 миллион тенге, 16 минг литр ёқилғи ҳамда бир нечта юк автомашиналари давлат фойдасига мусодара қилинди.
Мазкур ҳукм ҳали қонуний кучга кирмаган.