Turkiston viloyati sudi tomonidan O‘zbekiston hududiga noqonuniy yoqilg‘i yetkazib berishda ayblangan besh nafar shaxsga nisbatan hukm o‘qildi, deya xabar berdi nur.kz nashri.
Sud materiallariga ko‘ra, ayblanuvchilar Sariog‘ash tumanida 375 metr uzunlikdagi maxfiy yer osti tunnelini yotqizib, u orqali 2024 yil avgust–dekabr oylarida jami 420 tonnadan ortiq AI-92 benzinni O‘zbekistonga noqonuniy tarzda o‘tkazgan. Ushbu faoliyat oqibatida davlatga 112 million tenge (qariyb 2 milliard so‘m) miqdorida zarar yetkazilgan.
Sud qaroriga muvofiq, jinoiy guruh tashkilotchisi 15 yil muddatga, qolgan ishtirokchilar esa 13 yildan ozodlikdan mahrum etildi. Shuningdek, ayblanuvchilarning mulklari – 3 million tenge, 16 ming litr yoqilg‘i hamda bir nechta yuk avtomashinalari davlat foydasiga musodara qilindi.
Mazkur hukm hali qonuniy kuchga kirmagan.