Ўзбекистон Республикаси Президентининг фармонига мувофиқ, Равшан Мамажонович Маматов Ўзбекистон Республикаси Президенти Администрацияси ҳузуридаги Наркотиклар ва ўқотар қуролларни назорат қилиш агентлиги директори лавозимидан озод этилди. Бу ҳақда Президент матбуот хизмати маълум қилди.
Маълумот учун, Равшан Маматов 2024 йил август ойидан буён мазкур агентликка раҳбарлик қилиб келаётган эди. Унинг фаолияти давомида соҳадаги назорат ва мувофиқлаштириш ишлари юзасидан қатор танқидий фикрлар билдирилган.
Қайд этилишича, 27 январь куни Президент Шавкат Мирзиёев раислигида Тошкент шаҳар Ички ишлар бош бошқармаси ҳузуридаги Қўриқлаш бошқармасида ўтказилган видеоселектор йиғилишида Равшан Маматов фаолияти кескин танқид остига олинган эди.
Йиғилиш давомида давлат раҳбари иш самарадорлиги ва ёндашувда жиддий ўзгариш бўлмаса, лавозимга муносиблик масаласи кўриб чиқилишини очиқ билдирган. Орадан бир кун ўтиб қабул қилинган ушбу қарор ана шу огоҳлантиришнинг мантиқий давоми сифатида баҳоланмоқда.