Хитой расмийлари Си Цзиньпин ва Жозеф Байден ўртасидаги телефон мулоқотига қизиқиш билдирмаяпти. Бу ҳақда ўз манбаларига асосланиб, Reuters агентлиги хабар берди.
АҚШ етакчиси 5 ҳафта олдин Америка осмонида Хитой ҳаво шари уриб туширилгандан кейин Си Цзиньпин билан мулоқот ташаббуси билан чиққанди. Оқ уй амалдорлари икки давлат муносабатларини қайта йўлга қўймоқчи ва Байденнинг таклифи “очиқ-ойдин илк қадам” бўларди.
Аммо америкалик дипломатларнинг ҳаракатларига қарамай, Хитой томони телефон мулоқотига қизиқиш билдирмагани таъкидланган.
Reuters’нинг қайд этишича, АҚШ давлат котиби Энтони Блинкеннинг Мюнхен хавфсизлик конференциясида Ван И билан учрашуви икки давлат ўртасидаги тарангликни пасайтирмаган.
“Хитой учрашувни мувофиқлаштиришдан бош тортди, бу эса АҚШ давлат департаментининг Шарқий Осиё бўйича бош дипломати Дэниел Критенбринкни Ван Ини шахсан қидириши ва ундан учрашув бўлиб ўтиши ҳақида сўрашга мажбур қилди”, – деган агентлик манбаси.
Унинг қўшимча қилишича, бу мулоқот Вашингтон ва Пекин ўртасида 2021 йил Аляскада бўлиб ўтган музокаралардан кейинги энг мураккаб учрашув бўлган.
