Дунёнинг энг машҳур футболчиларидан бири Криштиану Роналдунинг ўғли – Жуниор Криштиану – Португалия У15 терма жамоаси сафида илк бор майдонга тушиб, катта эътиборни ўзига қаратди. Унинг халқаро турнирдаги иштироки Европанинг бир нечта нуфузли клублари скаутларини Хорватияга жалб қилди.
Хабарларга кўра, Японияга қарши ўйинда (4:1) Жуниорнинг ҳаракатларини “Манчестер Юнайтед”, “Тоттенхем”, “Бавария”, “Боруссия Дортмунд”, “Лейптсиг”, “Хоффенхайм”, “Ред Булл Залсбург”, “Интер”, “Ювентус” ва “Аталанта” клублари скаутлари томоша қилишди. Бу жамоалар ёш футболчининг отаси каби юлдузга айланиш имкониятини диққат билан кузатмоқда.
Маълумотларга кўра, айниқса, “Манчестер Юнайтед” Жуниорга катта қизиқиш билдирган. Эслатиб ўтамиз, у 2021 йилда отаси “қизил иблислар”га қайтганидан сўнг клуб академиясида 14 ой фаолият олиб борган. Ҳозирда клуб скаутлари унинг жорий ҳолати ҳақида раҳбариятга ҳисобот берган.
Гарчи Жуниор кеча Грецияга қарши учрашувда асосий таркибда майдонга тушган бўлсада, у ўйиннинг боришини кескин ўзгартира олмади. Унинг иштирокида Португалия 0:1 ҳисобида ортда бораётган эди. Қизиғи, айнан у алмаштирилганидан кейин жамоа ҳисобни тенглаштиришга муваффақ бўлди.
Маълумки, ҳозирда ҳам ота, ҳам ўғил Криштиану Роналдулар Саудия Арабистонининг “Ал-Наср” клуби таркибида тўп сурмоқда.